Torang Tau, Torang Nda Perlu

0 comments
Leon Manua di Watu Pinawetengan

 Torang tau kalo torang bukang orang jago
Mar setidaknya torang musti berusaha
Torang tau torang bukang orang kaya
Mar setidaknya torang musti bakarja
Torang tau torang bukang orang pande
Mar setidaknya torang musti blajar
Torang tau torang bukang Tuhan
Mar setidaknya torang cintaan Tuhan

 Torang nda perlu banyak sagala rupa
Cukup berjuang supaya hidop sama deng Tuhan da suruh
Nda perlu jadi jago skali
Nda perlu jadi pande skali
Nda perlu jadi kaya skali
Nda perlu jadi sempurna skali
Torang pe hidop tetap Tuhan sayang

 (Leon Manua da beking)

Kase Karas Ulang

0 comments
orang minahasa kebal senjata tajam

 Itu stow cuma cirita dulu
Dorang bilang kata torang pe peda paling tajam di dunia
Deng torang pe badang paling karas di dunia.
Itu stow so stenga mati mo jadi ulang

 Skarang peda so tumpul
Torang pe badang so lombo
Pasengkotan bekeng bodok samua
Tatinggal cirita samua

 Itu stow cuma peda yang tumpul
Torang pe tuama muda mulai kase tajang peda laeng
Kong torang pe wewene muda mulai kase tabal muka
Tatinggal fam samua

 Pas so nda tau mo beking apa
Lebe bae mari joh kase tajang ulang tu peda
Kase karas ulang tu badang
Bataria kuat-kuat "TUAMA"
Kong bale pa Amang Kasuruan pe jalang

 Bataria kuat-kuat "I YAYAT U SANTI"
Asal peda so tajang Jang tako mo maju
Tada kaki tiga kali kong ambe ulang torang pe identitas

 (Leon Manua da beking)

Salalu Joh Bagitu

0 comments
Leon Manua dan Ervina Kilis

 Salalu ada yang laeng
Tiap kali bakudapa deng ngana
Rupa ada laeng

 Salalu ada yang takancing
Tiap kali bakudapa deng ngana
Rupa takancing kita pe mata deng mulu

 Salalu ada yang capat
Tiap kali bakudapa deng ngana
Rupa lebe capat kita pe jantong babunyi

 Salalu joh bagitu
Tiap kali bakudapa deng ngana
Rupa babagitu trus yang jadi pa kita.

 (Leon Manua da beking)

Opo Soputan

0 comments
Ehh Opo Soputan
Torang komang ba pangge pa Opo
Bukang karna torang mo ba minta pokos-pokos
Mar torang cuma mo bilang
Kalo torang so nentau ba urus ini tanah

Ehh Opo Soputan
Torang leh ba pangge pa Opo
Bukang karna torang so jago
Mar torang cuma mo minta kase tunjung akang
Bagimana tu cara supaya torang tau bersyukur pa Amang Kasuruan

Ehh Opo Soputan
Kalo torang nyanda tau tarima kase pa Amang Kasuruan
Opo kase ajar akang depe cara
Torang kasiang masih muda
Masih ba blajar

Ehh Opo Soputan
Kalo ada yang bulum genap
Opo joh tu kase genap akang
Opo joh tu berdoa akang
Supaya Amang Kasuruan nyanda marah pa torang

Lantaran ini karja masih Opo pe karja
Kase genap akang torang pe kerja
Supaya Amang Kasuruan sayang pa torang

(Penyair Jalanan)

Kuala Kering Kerontang

0 comments

Lama di sabala aer ini kita duduk
Aer kuala so kering
Tinggal kita pe aer mata yang mengalir
Kita so nembole mandi kuala rupa dulu
Orang kampung so nembole cuci baju di sini
Enter mo kase mandi sapi so nembole
Kuala di blakang rumah so kering
Pohong seho lei so mulai kering
Kobong milu so nda pake
Bagini kalo torang so nda parduli deng alam
Tangkis akang joh kalo mo dapa aer
Mo berharap di Aer PDAM?
Itu sumber aer so tercemar deng limbah tambang
Apa leh mo jadi kalo bagini
Mo baharap aer pante?

Copyright © Puisi Dalam Bahasa Manado. All rights reserved.

Super SEO created by Blogger Tuts From Jom Kenal Islam